Global Textile’ning Farg‘onadagi yosh xodimlari Toshkentga tashrif buyurdi

Yaqinda O‘zbekistonda nishonlangan Yoshlar kuni munosabati bilan Global Textile kasaba uyushmasi Farg‘onadagi yosh xodimlar uchun Toshkentga sayohat tashkil etdi.

Dastur doirasida ishtirokchilar Islom sivilizatsiyasi markaziga tashrif buyurishdi. Ushbu maskan mamlakatimizning boy tarixiy va ma’naviy merosi bilan yaqindan tanishish imkonini beruvchi muhim madaniy-ma’rifiy makon hisoblanadi.

Sayohatning eng muhim qismlaridan biri esa kompaniyamiz bosh direktori Muzaffar Razakov bilan Toshkentdagi korxonamizda bo‘lib o‘tgan uchrashuv bo‘ldi. U kishi yoshlarni shaxsan kutib oldi, ular bilan samimiy suhbatlashdi hamda Global Textile’ning rivojlanish yo‘li, kompaniya miqyosi va ishlab chiqarishning turli yo‘nalishlari o‘rtasidagi bog‘liqlik haqida so‘zlab berdi.

Yosh xodimlar uchun bu tashrif kompaniyamiz miqyosini yaqindan ko‘rish, ishlab chiqarishning turli bosqichlari qanday o‘zaro bog‘langanini yaxshiroq anglash va ularning kundalik mehnati umumiy natijada qanchalik muhim o‘rin tutishini his qilish imkonini berdi.

Ularni hali oldinda ko‘plab professional yutuqlar kutmoqda. Va biz uchun ularning bu yo‘lning bir qismini aynan Global Textile bilan birga bosib o‘tayotgani alohida quvonchdir.