Har bir dala maydoni — tirik organizm

Har bir dala maydoni — tirik organizm

Aynan shunday fikrni Global Textile agronomlari bilan ularning kasbiy rivojlanish dasturi doirasida ishlayotgan paxtachilik bo‘yicha xalqaro ekspert Doron Nevo bildiradi.

Uning fikricha, qishloq xo‘jaligida barcha dalalarga birdek mos keladigan yagona tayyor yechim mavjud emas. Hatto yonma-yon joylashgan maydonlar ham tuproq holati, namlik darajasi, ob-havo sharoiti va o‘simliklarning rivojlanishi bilan bir-biridan farq qilishi mumkin.

Shu sababli agronom uchun dalani doimiy kuzatib borish, undagi o‘zgarishlarni vaqtida payqash va bu o‘zgarishlar ortida qanday sabablar turganini tushunish muhim. Bir xil sharoitlar kam uchraydi, qarorlar esa har safar muayyan vaziyat tahlili asosida qabul qilinadi.

Doron dalalarda va o‘quv mashg‘ulotlarida xalqaro tajribasi bilan o‘rtoqlashadi, biroq tayyor qoliplarni taklif qilmaydi. Dasturning asosiy maqsadi mutaxassislarda o‘zgarishlarni ko‘ra olish, ularning sabablarini tushunish va har bir dalaning o‘ziga xos xususiyatlarini hisobga olgan holda qaror qabul qilish ko‘nikmalarini rivojlantirishdan iborat.

Shu tariqa jamoada har bir maydonda kechayotgan jarayonlarni yanada chuqurroq tushunish shakllanadi. Dalaga e’tibor bilan yondashish esa aniq qarorlar qabul qilish va hosildorlikni oshirishga yordam beradi.