Hikoyamizning beshinchi bobi

Biz allaqachon fabrikalarimiz, ishlab chiqarish liniyalari, sexlarimiz va jamoalarimiz haqida so‘zlab berdik.
Paxta qanday qilib tolaga, tola ipga, ip matoga, mato esa tayyor mahsulotga aylanish jarayonini ko‘rsatdik. Ammo Global Textile hikoyasida yana bir muhim bosqich bor, u butun tasavvurni kengaytiradi.

Biz shuni tushundikki, mahsulot sifati va uning kelib chiqishi haqida aniq va ishonch bilan gapirish uchun ishni eng avvalo daladan, paxtaning o‘zidan boshlash zarur.
Mijozlar oldidagi mas’uliyat ishlab chiqarishdan ancha oldin boshlanadi. U birinchi urug‘ yerga qadalgandan boshlab shakllanadi. Shu sababli biz agro yo‘nalishni rivojlantirishga kirishdik.

Bugungi kunda Global Textile 75 ming gektar yer maydonida faoliyat olib boradi va ushbu yo‘nalishda 3 mingdan ortiq ish o‘rinlarini yaratdi. Farg‘ona viloyatidagi maydonlarimizga Toshkent viloyatining yana besh tumani va Surxondaryo viloyatining bir tumani qo‘shildi. Bu orqali biz nafaqat hududlarni, balki imkoniyatlarni ham kengaytirmoqdamiz.

Agro yo‘nalishning rivoji biz uchun tabiiy qadam bo‘ldi: ishlab chiqarish zanjirini to‘liq shakllantirib, biz uning boshiga, dalaga qaytdik. Endilikda paxtaning yo‘lini boshidan oxirigacha kuzatish va har bir bosqichda sifat hamda standartlarga kafolat berish imkoniga egamiz.