BCI vakilining tashrifi

Bugun Global Textile korxonalariga Turkiyadan kelgan Better Cotton Initiative (BCI) vakili tashrif buyurdi.
Tashrifning maqsadi – O‘zbekistonda Better Cotton standarti qanday joriy etilayotganini o‘rganish edi. Ayniqsa, paxtaning kelib chiqishini kuzatish imkonini beradigan traceable cotton tizimini amalda ko‘rish katta qiziqish uyg‘otdi.

O‘zbekistonda joriy etilgan klaster yondashuvi noyob imkoniyatlarni yaratmoqda: paxta yetishtirishdan tortib tayyor mahsulot ishlab chiqarishgacha bo‘lgan butun zanjir 80–100 km radiusdagi bir hududda jamlangan. Bu esa jarayonlarning shaffofligini ta’minlaydi va munosib mehnat hamda barqaror ishlab chiqarish tamoyillariga har bir bosqichda amal qilinishiga kafolat beradi.

Xalqaro brendlar uchun bunday mexanizmlar alohida ahamiyat kasb etmoqda. Har yili BCI standarti asosida yetishtirilgan paxtadan foydalanishga intilayotgan kompaniyalar soni ortib bormoqda va ular uning kelib chiqishini aniq tasdiqlashni talab qilmoqda. O‘zbekiston esa klaster tizimi orqali aynan shunday shaffoflik va ishonchlilikni taklif qila oladi.

Bunday tashriflar nafaqat Global Textile uchun, balki butun tarmoq uchun muhimdir. Biz O‘zbekiston global barqaror to‘qimachilik tizimining bir qismiga aylanayotganini va yetakchi xalqaro hamkorlar ishonchiga loyiq ekanini ko‘rsatmoqdamiz.