Bozor xavf ostida

“Agar mojaro davom etsa, oqibatlari sezilarli bo‘lishi mumkin. To‘qimachilik sanoati mavsumiylikka juda sezgir: boy berilgan ishlab chiqarish imkoniyatlarini keyinchalik tiklash oson emas.”
ITMF maqolasidan

Bugun jahon to‘qimachilik sanoati murakkab davrni boshdan kechirmoqda. Geosiyosiy vaziyat va harbiy voqealar xalqaro savdo, logistika hamda savdo yo‘laklarining barqarorligiga bevosita ta’sir ko‘rsatmoqda.

Global Textile uchun bu ayniqsa sezilarli: eksportimizning muhim qismi Yaqin Sharq, Yevropa, Shimoliy Afrika va Turkiya bozorlariga bog‘liq, ushbu yo‘nalishlarga olib boruvchi ko‘plab savdo marshrutlari esa hozir jiddiy cheklangan yoki vaqtincha yopilgan.

Bu tashqi bozorlarda ishlash va yetkazib berish barqarorligi uchun qo‘shimcha qiyinchiliklar tug‘dirmoqda. Shunday sharoitda jamoamiz vaziyatni diqqat bilan kuzatib bormoqda va eksport yo‘nalishlarini saqlab qolish uchun muqobil logistika yechimlarini izlamoqda.

Bugungi kunda bunday chaqiriqlar bilan O‘zbekistonning butun to‘qimachilik sanoati ham yuzlashmoqda va global savdodagi o‘zgarishlarga moslashmoqda.

Ammo aynan shunday davrlar yangi yechimlarni topish va hamkorlikni mustahkamlash uchun turtki bo‘ladi. O‘zbekiston iqtisodiyotining asosiy drayverlaridan biri bo‘lgan to‘qimachilik sanoati uchun tez moslashish va yanada kuchli bo‘lib borish qobiliyati ayniqsa muhimdir.