Global Textile’da trikotaj matolari sifati qanday tekshiriladi?
Bir qarashda bir xil koʻringan ikkita trikotaj matosi bir necha marta yuvilgach, oʻzini turlicha tutishi mumkin. Biri shakli va rangini saqlab qoladi, ikkinchisi esa kirishadi, rangi xiralashadi yoki yuzasida mayda tugunchalar paydo boʻladi. Bunday farqlarni oddiy koʻz bilan oldindan aniqlash deyarli imkonsiz.
Shu sababli Global Textile’da trikotaj matolarining sifati mijozlarga joʻnatilishidan oldin laboratoriya sinovlari orqali tekshiriladi.
Trikotaj matolari qanday sinovlardan oʻtkaziladi?
Yuvish va quritishdan keyingi oʻlcham barqarorligi sinovi matoning qanchalik kirishishi yoki choʻzilishini aniqlashga yordam beradi. Namunalar yuviladi, quritiladi va qayta oʻlchanadi. Olingan natijalar keyingi bichish va tikish jarayonlari uchun muhim ahamiyatga ega.
Sinovlarning alohida guruhi rangning chidamliligini tekshirishga qaratilgan. Mutaxassislar yuvishdan keyin rangning saqlanishini, quruq va nam ishqalanishda boshqa materiallarga rang oʻtishini, shuningdek, ter taʼsirida rangning oʻzgarishini baholaydilar.
Matoning foydalanish davomida tashqi koʻrinishini saqlash xususiyatini aniqlash uchun tukchalanish, yaʼni pilling sinovlari oʻtkaziladi. Maxsus uskunalarda namunalar mexanik taʼsirga uchratiladi va ularning yuzasidagi oʻzgarishlar baholanadi. Global Textile laboratoriyasida ushbu xususiyat turli usullar yordamida tekshiriladi.
Trikotaj matosining mustahkamligini baholash uchun bosim ostida yorilishga chidamlilik sinovi ham oʻtkaziladi. Maxsus uskuna namunaga beriladigan bosimni bosqichma-bosqich oshirib, matoning yorilishiga olib keladigan bosim va choʻzilish darajasini aniqlaydi.
Laboratoriyada matodan tayyorlangan suvli eritmaning pH darajasi ham oʻlchanadi. Bu koʻrsatkich boʻyash va pardozlash jarayonlaridan keyingi kislotalilik va ishqoriylik xususiyatlarini baholash imkonini beradi.
Laboratoriya sinovlaridan tashqari, trikotaj matolari vizual nazoratdan ham oʻtadi. Maxsus yoritilgan uskunalarda mato yuzasi tekshirilib, toʻqish, boʻyash va pardozlash jarayonlarida yuzaga kelishi mumkin boʻlgan nuqsonlar aniqlanadi.
Bu mijozlar uchun nima beradi?
Har bir sinov belgilangan uslub asosida oʻtkaziladi, natijalar esa tegishli talablar bilan solishtiriladi.
Bu Global Textile mijozlariga matoning xususiyatlarini oldindan bilish, ishlab chiqarishni rejalashtirishda ularni hisobga olish va tayyor mahsulotda nuqsonlar yuzaga kelish xavfini kamaytirish imkonini beradi.
Global Textile Oʻzbekistonda paxta yetishtirish va ip-kalava ishlab chiqarishdan boshlab trikotaj matolarini toʻqish, boʻyash va pardozlashgacha boʻlgan ishlab chiqarish zanjirini nazorat qiladi. Laboratoriya sinovlari ishlab chiqarishning yakuniy bosqichlarida mahsulot xususiyatlarining barqarorligini taʼminlashga yordam beradi.